Trafiku mbetet ndoshta makthi më i madh i qytetarëve të Tiranës, të cilët çdo ditë përballen me të në kryeqytet.
Por për të menaxhuar rreth 1 milion banorë, nuk është aspak e lehtë, veçanërisht për Policinë Rrugore.
Pikërisht, lidhur me këtë fakt por edhe më shumë problematika të tjera që ka trafiku në Tiranë ishte i ftuar në emisionin “Intervista e Ditës” me Erjon Çikun, Shefi i Trafikut në Policinë Rrugore të Tiranës, Taulant Gjoka.
Në fjalën e tij, Gjoka theksoi se puna e policisë rrugore dhe vështirësitë që ajo ka në çdo moment, janë të paparashikueshme. Kjo për shkak të dinamikës së trafikut, që ndryshon vazhdimisht.
I pyetur për masat konkrete të marra, veçanërisht tashmë që jemi në sezonin turistik dhe pas ndërhyrjeve që po bëhen në aksin Tiranë-Durrës, Gjoka nënvizoi se ka një trafik të shtuar veçanërisht në sheshin “Shqiponja”.
Por se nga ana tjetër, efektivët e shtuar në terren në pikat kyçe, kanë bërë që situata të menaxhohet, pavarësisht vështirësive që ajo përcjell.
Megjithatë, Shefi i Trafikut në Policinë Rrugore të Tiranës, bëri të ditur se krahas efektivëve në kryeqëzimet më të rëndësishme, tashmë ka polici edhe në rrugicat e lagjes.
Sipas Gjokës, kjo vjen për shkak të ndërgjegjësimit të qytetarëve dhe denoncimeve që ato bëjnë lidhur me abuzimet në lagjet e tyre. Gjoka nënvizoi se 95% e denoncimeve të qytetarëve janë të vërteta, çka tregon një rritje të besueshmërisë së tyre karshi Policisë.
